DILUNGA AJIPIGA KITANZI YANGA CHA MIAKA 3

KIUNGO Hasaan Saleh Dilunga katikati ya wiki hii alisaini mkataba wa miaka mitatu kuitumikia klabu ya Young Africans akitokea timu ya Ruvu Shooting aliyokua akiitumikia katika kipindi cha pili mfululizo katika Ligi Kuu ya Vodacom.

Mapema mtandao rasmi wa klabu uliandika juu ya taarifa za usajili wa kiungo huyo kusaini mkataba wa miaka mitatu kuanzia mzunguko wa pili wa Ligi Kuu na mashindano ya kimataifa ambayo timu ya Yanga itashiriki.

Dilunga katikati akitia dole gumba kwenye fomu ya Mkataba wa Yanga SC baada ya kusaini. Kulia ni Mwenyekiti wa Kamati ya Mashindano ya klabu hiyo, Abdallah Ahmed Bin Kleb na kushoto Mjumbe wa Kamati hiyo, Mussa Katabaro 

Kutua kwa Dilunga katika klabu ya Young Africans kulizua maswali mengi huku baadhi ya mitandao ikisema mchezaji huyo hajasajiliwa na mabingwa watetezi wa Ligi Kuu ya Vodacom Yanga SC na kuwa mtandao wa klabu umekurupuka.

Akiongea na www.youngafricans.co.tz Afisa Habari wa Yanga Baraka Kizuguto amesema Dilunga alikamilisha taratibu zote na kusaini mkataba na Yanga kwa miaka mitatu mbele ya viongozi wa Yanga ambao pia walishamalizana na uongozi wa Ruvu Shooting kabla ya kufikia kumsainisha mchezaji.

"Hatuna taratibu za kuongopa wala kutoa taarifa zisizo na ukweli katika mtandao wetu, mtandao wetu umekuwa maarufu ndani na nje ya nchi kwa sababu ya kutoa habari za ukweli na zenye uhakika kwa hiyo hatukukurupa juu ya hilo" alisema Kizuguto.

Aidha aliongeza Ukitazama idadai ya watu wanaotembelea mtandao wetu ndani na nje ya nchi achilia mbali facebook na twitter bado tumekua na watu wengi sana ambao wameijua Yanga, wanaipenda Yanga, wanaifuatilia Yanga kupitia mtandao wake wa klabu hivyo hatuwezi kuwaangusha kwa kutoa taarifa za uongo.

Dilunga alisaini mkataba wa kuitumikia Yanga katikati ya wiki mbele ya viongozi wa kamati ya mashindano waliongozwa na Abdallah Bin Kleb, Mussa Katabaro na Isaac Chanji. IMEHAMISHWA KUTOKA TOVUTI YA YANGA SC